Fjallabyggð

I. KAFLI
Almenn atriði

1. grein.

Hverjum manni er skylt að framfæra sjálfan sig, maka sinn og börn yngri en 18 ára. Þeim sem sækir um aðstoð skv. reglum þessum er skylt að leita sér að atvinnu og taka þeirri atvinnu sem býðst nema því aðeins að veikindi, örorka, hár aldur eða aðrar gildar ástæður hamli því.
Fjárhagsaðstoð skal veitt fólki í tímabundnum erfiðleikum og er hugsuð sem aðstoð við einstaklinga og fjölskyldur til að mæta grunnþörfum þeirra.

Skylt er að veita fjárhagsaðstoð til framfærslu einstaklinga og fjölskyldna sem ekki geta séð sér og sínum farborða án aðstoðar, sbr. IV. og VI. kafla laga um félagsþjónustu sveitarfélaga, nr. 40/1991, með síðari breytingum.

Fjárhagsaðstoð skal veitt í eðlilegum tengslum við önnur úrræði félagsmálanefndar, svo sem ráðgjöf og leiðbeiningar, í samræmi við V. kafla laga um félagsþjónustu sveitarfélaga.

Jafnan skal kanna til þrautar möguleika á annarri aðstoð s.s. atvinnuleysisbótum, örorkubótum, sjúkradagpeningum o.s.frv.

Hafi umsækjandi hafnað atvinnu eða sagt starfi sínu lausu án viðhlítandi skýringa eða hafnað starfsleitaráætlun, er félagsmálanefnd heimilt að greiða hálfa grunnupphæð til framfærslu er tilgreind er í III.. kafla reglna þessara þann mánuð sem umsækjandi hafnar vinnu svo og mánuðinn þar á eftir.

Sama á við um atvinnulausan umsækjanda sem ekki framvísar skráningarskírteini eða dagpeningavottorði frá svæðisvinnumiðlun án viðhlítandi skýringar.

Einstaklingar með lögheimili í Fjallabyggð geta sótt um fjárhagsaðstoð skv. reglum þessum. Þurfi fólk á skyndilegri aðstoð að halda í dvalarsveitarfélagi er skylt að veita tímabundna aðstoð. Skal um það haft samráð við lögheimilissveitarfélag og aðstoð metin og veitt í samræmi við reglur þess. Lögheimilissveitarfélag endurgreiðir dvalarsveitarfélagi kostnaðinn, sbr. 14. gr. laga um félagsþjónustu sveitarfélaga

Við meðferð og vinnslu umsókna ber að sýna umsækjanda fyllstu virðingu og gæta trúnaðar um málefni hans.

II. KAFLI.
Umsóknir um fjárhagsaðstoð og málsmeðferð

2. grein.

Fjárhagsaðstoð er veitt ýmist í formi styrkja eða lána. Fjárhagsaðstoð skal veitt sem lán ef umsækjandi sjálfur óskar þess eða könnun máls leiðir í ljós að umsækjandi á von á hærri atvinnutekjum eða afturvirkum greiðslum frá t.d. Tryggingastofnun ríkisins, Atvinnuleysis-tryggingarsjóði, eða lífeyrissjóðum. Einnig skal tekið tillit til eigna í þessu sambandi.

Lán eru vaxtalaus.

3. grein.

Umsóknir um fjárhagsaðstoð skal leggja fram hjá félagsþjónustu Fjallabyggðar. Við mat á beiðnum um fjárhagsaðstoð skulu eftirtalin gögn liggja fyrir:

• Umsókn á þar til gerðu eyðublaði, undirrituðu af umsækjanda eða talsmanni hans. Þar skulu koma fram m.a. upplýsingar um persónulegar aðstæður, fjölskyldugerð, fjölskyldustærð, nafn maka, fjöldi barna á framfæri, atvinnu, húsnæðisaðstæður, lögheimili, tekjur og eignir.
• Tekjuyfirlit sem sýnir mánaðarlegar tekjur umsækjenda og gjöld. Við gerð þess skulu ætíð liggja fyrir afrit af launaseðlum fyrir tvo síðustu mánuði ef um atvinnutekjur er að ræða og/eða afrit síðasta bótaseðils frá Tryggingastofnun ríkisins. Einnig upplýsingar um aðrar tekjur, s.s. greiðslur úr atvinnuleysistryggingarsjóði, frá verkalýðsfélögum og lífeyrissjóðum. Umsækjandi skal skila staðfestu afriti af síðasta skattframtali.
• Viðbótarupplýsingar sem félagsþjónustan hefur aflað um hagi umsækjenda og rétt hans á greiðslu frá Tryggingastofnun ríkisins, sjúkrasamlagi, lífeyrissjóðum verkalýðsfélaga, atvinnuleysistryggingum eða öðrum aðilum. Einnig upplýsingar um lánamöguleika þegar slíkt á við. Samráð skal hafa við umsækjanda áður en upplýsinga er leitað, sbr. 59. og 62. gr. laga um félagsþjónustu sveitarfélaga. Heimilt er að hafna aðstoð ef umsækjandi neitar leyfis til að afla upplýsinga, t.d. úr lífeyrissjóðum.
• Sé umsækjandi atvinnulaus skal hann framvísa stimpilkorti frá vinnumiðlun. Ef um veikindi er að ræða skal umsækjandi framvísa læknisvottorði.
  

4. grein.

Félagsmálastjóri ákvarðar aðstoð í eftirfarandi tilvikum:

• alla fjárhagsaðstoð skv. III. - VII. kafla þessara reglna aðra en skv. 15. gr. 7. tl. (um lán eða styrki til greiðslu skulda, svo og ef farið er fram á að eldri lánum sé breytt í styrk).
• skyndiaðstoð til nauðsynlegrar framfærslu og vegna sérstakra áfalla, skv. 6. gr. reglnanna.

Félagsmálanefnd ákvarðar aðstoð:

• þegar sótt hefur verið um fjárhagsaðstoð í samtals 6 mánuði á síðustu 12 mánuðum,

• ef upp koma álitamál og reglur þessar eru ekki nægilega afgerandi.

5. grein.

Fjárhagsaðstoð skal að öðru jöfnu greidd einn mánuð í senn og skulu ákvarðanir um aðstoð að jafnaði ekki ná yfir lengra tímabil en þrjá mánuði. Aðstæður þeirra sem hafa fengið fjárhagsaðstoð í 6 mánuði samfellt skulu kannaðar sérstaklega og félagslegri ráðgjöf beitt ásamt öðrum viðeigandi úrræðum. Í þeim tilvikum sem fjárhagsaðstoð hefur verið veitt samfellt í 6 mánuði skal leggja málið fyrir félagsmálanefnd.

6. grein.

Fjárhagsaðstoð er ekki greidd aftur í tímann, jafnvel þó umsækjandi hafi átt rétt á aðstoð en ekki leitað hennar. Félagsmálanefnd Fjallabyggðar getur í undantekningartilvikum samþykkt að aðstoð skuli greidd aftur í tímann.

7. grein.

Í neyðartilfellum er heimilt að afgreiða skyndiaðstoð til skjólstæðinga án þess að fullnægjandi upplýsingar liggi fyrir um fjárhagsstöðu. Skyndiaðstoð er í meginatriðum ætluð til þess að tryggja börnum og unglingum innan fjölskyldu farborða. Aðstoðin skal að hámarki vera 20% af grunnframfærslu einstaklings.

8. grein.

Umsóknum skal svarað skriflega. Fjárhagsaðstoð er að öllu jöfnu lögð inn á bankareikning viðkomandi. Sé umsókn hafnað fær umsækjandi skriflegar upplýsingar um forsendur synjunar og honum jafnframt kynntur réttur til áfrýjunar bæði til félagsmálanefndar Fjallabyggðar og til úrskurðanefndar félagsþjónustu.

Telji einhver rétti sínum hallað með afgreiðslu félagsþjónustu Fjallabyggðar getur viðkomandi skotið máli sínu til félagsmálanefndar innan fjögurra vikna frá því ákvörðun lá fyrir. Ákvörðun félagsmálanefndar má skjóta til úrskurðarnefndar félagsþjónustu.

9. grein.

Heimilt er að synja umsækjendum um fjárhagsaðstoð sem eru í neyslu áfengis- eða annarra vímuefna en bjóða aðstoð til að fara í áfengis/vímuefnameðferð. Heimilt er að veita þessum aðilum 50% grunnfjárhæð í sérstökum undantekningartilvikum.

10. grein.

Vakni grunur um rangar eða villandi upplýsingar, t.d. um svarta atvinnustarfsemi, skal leitast við að upplýsa málið og leita aðstoðar lögreglu og dómsyfirvalda. Ef í ljós kemur að grunur er á rökum reistur er viðkomandi gert að endurgreiða fjárhagsaðstoðina og í alvarlegum tilvikum er málið sent til lögreglunnar.

III. KAFLI.
Framfærslugrunnur

11. grein.

Fjárhagsaðstoð til einstaklings 18 ára og eldri tekur mið af útgjöldum vegna daglegs heimilishalds og getur numið allt að kr. 95.000 á mánuði. Framfærslugrunnur vegna einstaklinga hefur stuðulinn 1.0 en vegna hjóna og fólks í sambúð stuðulinn1,6. Ofangreind upphæð breytist í janúar ár hvert samkvæmt samþykkt félagsmálanefndar hverju sinni og almennt með hliðsjón af hækkun neysluvísitölu milli ára (sbr. 28. grein)

Mat á fjárhagsaðstoð er óháð því hvort barn eða börn búa á heimilinu.

12. grein.

Við afgreiðslu fjárhagsaðstoðar er gert ráð fyrir því að aukalegur kostnaður vegna barna greiðist af barnabótum, barnabótaauka og meðlögum, ef við á.

Ungu fólki á aldrinum l8 til 20 ára, sem býr hjá foreldrum en á rétt á fjárhagsaðstoð sbr. 4. kafla, skal reiknuð framfærsla sem nemur 33% af upphæð grunnfjárhæðar. Hafi einstaklingur, sem fellur undir ofangreint, forsjá barns, skal viðkomandi reiknuð full grunnfjárhæð.

Kostnaði vegna húsnæðis er mætt með húsaleigubótum ef fólk leigir á frjálsum markaði, vaxtabótum hjá fólki sem hefur keypt sér íbúðir og lágum húsnæðiskostnaði hjá þeim sem eiga íbúð í félagslega kerfinu.

13. grein.

Allar tekjur einstaklingsins, aðrar en greiðslur vegna barnaörorku, barnameðlags, barnabóta, húsaleigubóta og vaxtabóta, koma til frádráttar við ákvörðun um upphæð fjárhagsaðstoðar.

Með tekjum er hér átt við allar tekjur einstaklings/fjölskyldu sem ekki eru ætlaðar til framfærslu barna, þ.e. atvinnutekjur, allar skattskyldar tekjur TR, greiðslur úr lífeyrissjóðum, atvinnuleysisbætur, leigutekjur, mæðralaun o.s.frv. Umönnunarbætur vegna barna koma til frádráttar sem tekjur.

Staðgreiðsla skatta og iðgjöld í stéttarfélög og lífeyrissjóði eru dregnar frá tekjum.

Endurgreiðslur ofgreiddra skatta teljast ekki til tekna, enda er ekki tekið tillit til skulda umsækjanda við útreikning á fjárhagsaðstoð nema í undantekningartilvikum, sbr. V. kafla.

14. grein.

Við útreikning á fjárhagsaðstoð skal taka mið af eignum öðrum en íbúðarhúsnæði, sem umsækjandi býr í, og bíl sem sannanlega er umsækjanda nauðsynlegur. Sé um aðrar eignir að ræða skal umsækjanda bent á fyrirgreiðslu banka.

Undanþegið þessu er ef eignir teljast sannanlega gera viðkomandi kleift að stunda atvinnustarfsemi sem leiða mun til þess að hann verði sjálfbjarga og skal þá félagsmálanefnd Fjallabyggðar fjalla sérstaklega um málið.

Ef sótt er um fjárhagsaðstoð lengur en 6 mánuði skal kanna hvort íbúðarhúsnæði sé af eðlilegri stærð miðað við fjölskyldustærð og hvort mögulegt sé að fá ódýrara húsnæði í viðkomandi sveitarfélagi. Félagsmálanefnd áskilur sér rétt til að leita eftir ráðgjöf fyrir viðkomandi umsækjanda, frá Ráðgjafastofu fjármála heimilanna þegar nefndin telur þess þörf.

15 grein.

Atvinnurekendur og sjálfstætt starfandi einstaklingar, sem hafa lægri tekjur en sem nemur grunnfjárhæð, eiga rétt á fjárhagsaðstoð að því tilskyldu að þeir hafi stöðvað atvinnurekstur sinn og leitað réttar síns til atvinnuleysisbóta í samræmi við ákvæði laga um atvinnuleysistryggingar, nr. 12/1997.

Sé umsækjandi í hlutastarfi með tekjur undir grunnfjárhæð skal gerð krafa um að viðkomandi skrái sig hjá vinnumiðlun og leiti að fullu starfi.

16. grein.

Heimilt er í sérstökum tilvikum að taka tillit til áfallandi meðlagsgreiðslna til hækkunar á framfærslu, hafi umsækjandi staðið í skilum með greiðslur. Það sama gildir um áfallandi skattaskuldir sem dregnar eru reglulega af launum. Umsækjandi skal sýna fram á að hann hafi staðið í skilum með meðlag a.m.k. undanfarna þrjá mánuði. Átt er við meðlagsgreiðslur hverju sinni, en ekki uppsafnaðar meðlagsskuldir.

IV. KAFLI.
Réttur til fjárhagsaðstoðar.

17. grein.

Fjárhagsaðstoð er veitt einstaklingum og fjölskyldum. Sérhver fjárráða einstaklingur sem á lögheimili í Fjallabyggð á rétt á að leggja fram umsókn. Skylt er að veita fólki í neyð sem dvelur tímabundið í Fjallabyggð, tímabundna aðstoð. Skal um það haft samráð við lögheimilissveitarfélag og aðstoð metin og veitt í samræmi við reglur þess enda endurgreiði lögheimilissveitarfélag aðstoðina.

Fólk sem er í skráðri sambúð í Þjóðskrá á sama rétt til fjárhagsaðstoðar og hjón. Sambúðin skal hafa verið skráð í Þjóðskrá í a.m.k. eitt ár áður en umsókn er lögð fram, sbr. 19.gr. laga um félagsþjónustu sveitarfélaga

Þeim sem sækir um aðstoð samkvæmt reglum þessum er skylt að leita sér að atvinnu og taka þeirri atvinnu er býðst nema veikindi, örorka, aldur eða aðrar gildar ástæður hamli því.

Einstaklingum sem búa hjá foreldrum skal að jafnaði reikna 33% grunnfjárhæðar á mánuði eða mismun á þeirri upphæð og tekjum þeirra.

Hafi einstaklingur, sem fellur undir ofangreint, forsjá barns, skal viðkomandi reiknuð full grunnfjárhæð.

Einstaklingar 17 ára og yngri, eiga alla jafna ekki rétt á fjárhagsaðstoð í eigin nafni.

V. KAFLI
Heimildir til fjárhagsaðstoðar vegna sérstakra aðstæðna

18. grein.

1. Fæðingarstyrkur til ungra mæðra sem eru einstæðar og eru að eiga sitt fyrsta barn, eru með tekjur undir viðmiðunarmörkum og hafa átt við mikla félagslega erfiðleika að stríða. Aðstoðin er hugsuð til þess að kaupa útbúnað vegna barnsins, s.s. vagn, rúm o.s.frv. Hámarksaðstoð er 50% af grunnfjárhæð einstaklings.
2. Jólastyrkur til fjölskyldna með börn á framfæri undir 16 ára aldri, og eru undir viðmiðunartekjum. Upphæðina skal miða við 50% af grunnaðstoð fyrir einstakling en margföldunarstuðull fyrir hvern fjölskyldumeðlim er 0.5.
3. Fermingarstyrkur til fjölskyldna með tekjur undir viðmiðunarmörkum, sem nemur 50% af grunnfjárhæð einstaklings.
4. Húsbúnaðarstyrkur til öryrkja sem eru að hefja sjálfstæða búsetu. Hámarksaðstoð er 50% af grunnfjárhæð einstaklings. Húsbúnaðarstyrkir greiðast að jafnaði aðeins einu sinni.
5. Styrkur til nauðsynlegra tannviðgerða fyrir fólk sem hefur átt við langvarandi atvinnuleysi að stríða, eða er öryrkjar og hefur átt við mikla félagslega erfiðleika að stríða. Hámarksstyrkur til tannviðgerða er 50% af grunnfjárhæð einstaklings. Kostnaðaráætlun tannlæknis skal ávalt fylgja með umsókn.
6. Stofnkostnaður síma hjá öryrkjum sem búa einir.
7. Hlutur aðstoðarþega í greiðslu vegna heimaþjónustu skv. gjaldskrá heimaþjónustu.
8. Greiðsla liðveislu vegna fatlaðra einstaklinga og greiðsla vegna kostnaðar við framkvæmd liðveislu samkvæmt reglum sem félagsmálanefnd Fjallabyggðar hefur sett.
9. Heimilt er að veita aðstoð til greiðslu útfararkostnaðar þegar staðreynt hefur verið að dánarbúið getur ekki staðið undir útför hins látna. Útfararstyrkur getur numið allt að tvöfaldri grunnfjárhæð. Eftirfarandi gögn þurfa að fylgja umsókn um útfararstyrk: Staðfest ljósrit af skattframtali hins látna, launaseðlar og greiðsluyfirlit frá tryggingum og lífeyrissjóðum, staðfesting frá stéttarfélagi um rétt til útfararstyrks, tilkynning sýslumanns um skiptalok á grundvelli eignayfirlýsingar, sbr. 25. gr. laga um skipti á dánarbúum o.fl., nr. 20/1991, eða einkaskiptaleyfi útgefið af sýslumanni til erfingja skv. 31. gr., sbr. 28. gr. laga um skipti á dánarbúum o.fl.
10. Heimilt er að veita tekjulágum eftirlifandi maka lán eða styrk vegna útfararkostnaðar þegar dánarbúið getur ekki greitt fyrir útför hins látna og eignir eftirlifandi maka eru ekki aðrar en íbúðarhúsnæði sem umsækjandi býr í.
11. Heimilt er að veita foreldri eða foreldrum sem hafa tekjur á eða undir grunnfjárhæð fjárhagsaðstoð vegna útfararkostnaðar barns. Samþykkt aðstoð greiðist gegn framvísun reiknings frá útfararstofu og annarra gagna um kostnað vegna útfarar.
12. Áfallaaðstoð. Heimilt er að veita tekjulágum einstaklingum eða fjölskyldum fjárhagsaðstoð vegna skyndilegs missis búslóðar eða annars eignamissis sem orðið hefur vegna bruna eða náttúruhamfara. Einnig þegar rýma þarf íbúð af heilbrigðisástæðum er heimilt að veita aðstoð til kaupa á búslóð. Aðstoðin kemur einungis til álita þegar tjónþoli hefur ekki haft heimilistryggingu eða aðra tryggingu sem bætir tjónið. Viðmiðunarmörk aðstoðar samsvara einni grunnfjárhæð.
    

VI. KAFLI
Fjárhagsaðstoð skv. lögum nr. 58/1992, með síðari breytingum, um vernd barna og ungmenna.

19. grein.

Greiða skal ýmsan kostnað vegna barna og ungmenna sem eru í tímabundnu fóstri á vegum Barnaverndarnefndar, s.s. kostnað vegna skólagöngu og tannlæknakostnað. Greina skal frá í fóstursamningi hvaða kostnað Félagsþjónusta Fjallabyggðar á að bera á meðan á fóstri stendur.

20. grein.

Greiða skal 1ögfræðikostnað fyrir foreldra þegar mál sæta meðferð fyrir Barnaverndarnefnd ÚtEy, sbr. 46. grein laga nr. 58/1992, með síðari breytingum, um vernd barna og ungmenna. Taka skal tillit til fjárhagsstöðu foreldra við ákvörðun aðstoðar. Hámark greiðslu samsvarar einni grunnfjárhæð.

Einnig skal greiða kostnað vegna áfrýjunar máls til Barnaverndarráðs Íslands. Taka skal tillit til fjárhagsstöðu foreldra við ákvörðun aðstoðar.

Hámark greiðslu samsvarar 50% af grunnfjárhæð.

Ef Barnaverndarnefnd ÚtEy skipar barni talsmann, sbr. 3. mgr. 46. greinar laga nr. 58/1992, með síðari breytingum, um vernd barna og ungmenna, gilda sömu reglur og hér að ofan.

Foreldrar og forráðamenn velja sjálfir lögmann en gert er sem skilyrði að viðkomandi lögmaður hafi réttindi til málflutnings fyrir héraðsdómi eða hæstarétti, sbr. 9. gr. og 14. grein laga nr. 61/1942 um málflytjendur.

Lögmanni er í upphafi kynntir greiðsluskilmálar sveitarfélagsins vegna málsins.

21. grein.

Félagsmálanefnd Fjallabyggðar er heimilt í samráði við Barnaverndarnefnd ÚtEy að greiða annan kostnað sem skapast vegna vinnu meðferðarmála og er nauðsynlegur til að tryggja öryggi/velferð barna. Hér getur verið um að ræða kostnað vegna ráðningar tilsjónarmanns, sumardvalar í sveit o.s.frv.

VII. KAFLI.
Fjárhagsaðstoð til fólks sem á við áfengis/vímuefnavanda að stríða.

22. grein.

Umsækjendur sem eiga í erfiðleikum vegna neyslu áfengis og vímuefna skal vísað á viðeigandi meðferðarstofnanir. Félagsmálanefnd Fjallabyggðar er heimilt að greiða fararkostnað viðkomandi af því að fara í meðferð.

Neiti umsækjandi að fara í viðeigandi meðferð skal honum ekki reiknuð framfærsluaðstoð skv. III. kafla. Hins vegar er heimilt að greiða húsaleigu beint til leigusala og greiða til matvörukaupmanns ákveðna upphæð mánaðarlega til kaupa á fæði og nauðsynlegum hreinlætisvörum.

Sé ágreiningur um það hvort viðkomandi sé í neyslu skal honum gert að afsanna neysluna, t.d. með læknisvottorði, þvag eða blóðprufum. Einnig skal umsækjandi stimpla sig atvinnulausan og vera þannig viðbúinn að taka vinnu eða framvísa læknisvottorði um að hann sé óvinnufær.

23. grein.

Umsækjendur sem eru í áfengis/vímuefnameðferð eiga rétt á vasapeningum, kr. 5.000,- á viku þar til greiðsla sjúkradagpeninga tekur við, þegar:

• viðkomandi er ekki á launum á meðan meðferð stendur.

• viðkomandi hefur ekki bætur frá T.R. eða öðrum.

24. grein.

Umsækjendur sem dvelja á áfangaheimilum eiga rétt á greiðslu dvalarkostnaðar í allt að 6 vikur eftir meðferð. Einnig eiga þeir rétt á vasapeningum, kr. 3.000 - 5.000 á viku (eftir því hversu hátt hlutfall fæðis er inni í dvalargjaldinu á áfangaheimilinu, ef fullt fæði þá 3.000, ef 75% fæði þá 5.000) á meðan að dvöl stendur yfir. Félagsmálanefnd getur ákveðið að styðja fólk til að vera lengur á áfangaheimilum ef forsendur þykja vera til þess, t.d. ef fólki sem búið er að vera lengi í harðri neyslu gengur vel á áfangaheimilum er hugsanlegt að styðja þá ákvörðun lengur en 6 vikur. Gerðar eru þær kröfur til umsækjenda að þeir stimpli sig atvinnulausa eftir að þeir koma úr áfengismeðferð eða skili læknisvottorði um að þeir séu óvinnufærir. Aðstoð félagsmálastofnunar við greiðslu dvalar á áfangaheimili skerðist í réttu hlutfalli við bótarétt viðkomandi.

25. grein.

Kynna skal niðurstöðu umsóknar svo fljótt sem unnt er. Sé umsókn hafnað í heild eða að hluta skal umsækjandi fá skriflegt svar þar sem ákvörðun er rökstudd með skýrum hætti með vísan til laga um félagsþjónustu sveitarfélaga og reglna sveitarfélagsins um fjárhagsaðstoð og kynna honum um leið rétt hans til áfrýjunar til félagsmálanefndar.

VIII. KAFLI.
Málskotsréttur og endurupptaka máls

26. grein.

Telji umsækjandi á rétt sinn hallað skv. reglum þessum er honum heimilt að vísa ákvörðun hlutaðeigandi starfsmanna til félagsmálanefndar innan 4 vikna frá því honum barst vitneskja um ákvörðun. Félagsmálanefnd skal fjalla um umsókn og taka ákvörðun svo fljótt sem unnt er.

Umsækjandi getur skotið ákvörðun félagsmálanefndar til úrskurðarnefndar félagsþjónustu. Skal það gert innan fjögurra vikna frá því umsækjanda barst vitneskja um ákvörðun félagsmálanefndar.

27 grein.

Umsækjandi getur óskað þess að mál sé tekið til meðferðar á ný ef afgreiðsla félagsmálanefndar á umsókn hans hefur byggst á ófullnægjandi eða röngum upplýsingum um málsatvik eða ákvörðun hefur byggst á atvikum sem breyst hafa verulega frá því að ákvörðun var tekin. Beiðni um endurupptöku skal beina til bæjarráðs, innan 3ja mánaða frá birtingu ákvörðunar.

Meti bæjarráð að lagaleg skilyrði séu fyrir hendi, er erindi um endurupptöku vísað til félagsmálanefndar til málsmeðferðar. Efnisatriði máls skulu ekki lögð fyrir bæjarráð.

IX. KAFLI
Gildistími

28. grein.

Grunnupphæð fjárhagsaðstoðar tekur mið af neysluvísitölu og skal breytt 1. janúar ár hvert í samræmi við hana.

Reglur þessar sem settar eru samkvæmt 21. gr. laga um félagsþjónustu sveitarfélaga nr. 40/1991 voru samþykktar í félagsmálanefnd 8. október 2007 og af bæjarstjórn Fjallabyggðar 16. nóvember 2007.

Hlaða niður PDF-skrá